اوستو اوستونه
بير قارا بولوت كونلومون گويونه فيرتينا ساليب
باخيرام... گورورم
يازيغيم گلير
مينلر قاريشقايا
بير جوري سئرچنين ديمديينده دارا چكيلیر
بينيمي فيكريمين مئشه سينده آزديريرام
بيز اويرنميشيق گوروب سوسماقا
ايتين بئله قودوران يئرينده
بير پيشي ين الي له لكدن بوش قالماسين
سکینه پورحسن
ساققیز
... و بو گون من
او قدر چئیندیم ساققیز کلمه سین کی
دوداقلاریمدا ساققیز رنگی
آلمیش
آسلانیرام اونا ،یالواریرام بونا
بیرینین آردینجا کوشوب
بیرینه ده باخیشلاریم یالواریر...
دیزلریم ده کی گوزلر سوسقون
سنه گوز دیکیر
سنی یوکسلدیب اوزومو یئندیریرم
بلکی مندن بیر ساققیز آلاسان!
جوجوق لوغومون نئشه سین ساتیرام
اوجوز اوجوز...
آلمیور موسون؟
سون ساققیزیم، الیمده قالمیش....
.
.
... و بوگون سن
باشین سیگارا دومان ایچینده
بوشالان قدح لره دولان دردینی
ووروب دووارلارا عیصیان ائدرکن
یول قیراغیندا اوتورموش جوجوغون
باشماقلارینین پلتک دیلینی آنلاماز
بیر... ایکی... اوچ... آددیم گئچرسن
دورارسان ...دونرسن...ساققیز آلارسان
سیگاران منی یاخار،ساققیزیم سنی!
او آخشاملی یاغمور دا بیر شئی لر دوشونمک ده
ساققیز دیشلری آغارتماغا آلینمادی کی
دوداقلاری قاناتماغا
قان آتماغا....
ابوالفضل عطالو
گیزلی سئودا
آنامدان گيزلي اوپدوم سنی
بلكده كيتابيمدان.
دلي يه دونموش تانري!
يوخسا ،گويو قوللاريندا سيخيب بئلجه آغلاتمازدي
يارين بو كورپه اوپوشلر شهرين اتگين بولاياجاقلار
وسوكاكلاردا آخان كور باخيشلار سوينجي گوزلريميزدن يویاجاقلار
بلكه ده دوداقلاريميز آنالار سوتونده محبوس قالاجاقلار...
ائح
ندن كيمسه منه قانیمدان دوغولان كورپمي آووتماغي اويرتمه ميش
كي بئلجه كنديم اوستومه يوگوروب آدام ليغيمي ديديك-ديديك سوكور
بيليرم يالنیز بارماقلارین سئونجي اللريمدن امجك
بويویجك دونياميز بویويجك ايچين
وگوزلريميز سوچلارا ياراشمادان
كورپميزه ديل اولاجاق
قوي دلي يه دونسون تانري
قوي آنالار سوچوني كورپلر اوده سين
قوي...
آنامدان گيزلي اوپدوم سني.
سکینه پورحسن
یاشام
یاشام ایکی سیخیلمیش
ایکی یومروقلانمیش
ایکی گیزلی
آووج دا دیر...
ساغی چالارسان بوش گلیر
سولو چالارسان بوم بوش...
گیزله میش گول اورگینی
آرخاسیندا!
ابوالفضل عطالو
بیوک شاعیر یوسوف هایال اغلو دونیاسین دئگیشدی! 
آذربایجان
ياغيشلارين ماهنيسينا جومجولوق ايسلانيب
دويغومون اوباسي آلتيندا
آديني چوبانلارين توتكلرينين ايستي سسي تك
كونلومون ورنيسينه توخویورام
گوزلريمدن لام-لام آدينين آرازي آخيب
دوداقلاریمدان يام-ياشیل موغان تك گووريرسن
ديشلريمين زيروسيندن دنيز پاپاخلي ساوالان تك اوجاليب
ديليمين پيناريندان تورك-تورك آخيب
قانيمدا دالغالانيرسان
آذربايجانيم
سکینه پورحسن
آزادلیق
بیر سانجی
بیر آغری
آنا فریادی
جوجوق فریادی
قاریشیر بیربیرینه...
الی قولو آیاقلاری چیپلاق
الی قولو آیاقلاری قان ایچینده
دوغولور بیر جوجوق
آچیلیر بیر چیچک
دوغولور آزادلیق!
اوزگورلوک.
.
.
.
سون ضربه
سون یارا
آنا فریادی
جوجوق فریادی
قاریشیر بیربیرینه
الی قولو آیاقلاری چیپلاق
الی قولو آیاقلاری قان ایچینده
اولورلر اینسانلار
سولورلار چیچکلر
دوغولور آزادلیق!
اوزگورلوک.
ابوالفضل عطالو
بایرام بالیغی
بايرام يئلي باغچاميزين آغاجلاريندان كووف گئدير
یئنه ده قونشوموزون آلا پيشيگي ديواريميزين صفاسيندا اوزانيب
ايستي دويغولاريم ساري کوینه ییم تك جانيمي قوجاقلايیر
و بير او ن تومن هوسي آووجيمي قيديقلايیر
قيسيليرام آتامين گوزونه
ايستكلريم گوزلرينه بويلانير
اللریمده کی بانكا دولوسي جسارتله
يوموشاق قانير
آنلايیر بانكانين سوسوزلوغون
آووجومین هوسينده
ايندي كوچه نین باشينداكي بوتون باليقلار گوزلریمده اوزورلر
بلكده آرزولاريمدا گزيرلر
اورگيم ايچيمده سئوينج شاپپیلدادیر
.
.
.
ائح نه دن گوزلریمی یومدوم
بوتون باليقلار بوغولدولار
ياديمدادیر بیر گونده ايي دوسلوغو ائتدیم باليقلاريملا
قاينار يازيقليغيما بوكدوم
اولدولر
ايچيم اوشودو
بوتون بايرامي سوسدوم
دولدوم بانكانين بوش اوره ینه
و ياغديم
كيمسه بيلمه دي
يالنيز بير قونشونون آلا پيشيگي آنلادي
ائح ندن گوزلريمي يومدوم
بوتون باليقلار بوغولدولار
81/12/13 سکینه پورحسن
کارت پوستال
ایکی داملا یاش
دورت گوز
بیر کارت پوستال :
"آیریلیق دونیانین سونو ده گیل."
.
.
.
ایکی ساری گول
دورت قیرمیزی
بیر ایکی دن گوچلو.....
آرزی لارینا ایصرار ائتمه.
ابوالفضل عطالو
گونه باخان
يازيق گونه باخان
آلداندين گونشين ايشيق ليغينا
اوتوندان هئچ نده قورخمادين
گونش ايچيني قارالديب اوزوني ساراتدي
ايچين اويونجاق اولدو ديشلره
اوزونده سامان اولوب يئلي بزدي
يازيق گونه باخان
سنین اوریين داغلاندي لاله نين باشي اوجالد ي
اما باشين ساغ
بئنده اوجال
بوي آت
گونشه چات
اولسنده عاشيق اول
اولسنده عاشيق اول
سکینه پور حسن
ده یر
بو گون ده سونا اردی
ساتیلمادی الیمده قالان
قیرمیزی ساخسی
ایچینده اوره گیمی اکمیشدیم
ده یرینی سوران اولمادی دییم:
بیر باخیش!
ابوالفضل عطالو
ترافیک ایشیقی
سن له من آراسیندا
یالنیز اون بش حرف قالدی
اوچ میصراع
اوچ سطیر
جاددانین بیاض سطیرلرین
تورکو تورکو یازا یازا گلمیشدیم
بیردن قیرمیزیا دوندو ترافیک ایشیقلاری
سن گیچدین
من سه
یاریم قالدی تورکولریم!
ابوالفضل عطالو
آلما
كيم دئيیر
آلمانين قيرميزي ياناقلاري
گونشين اللريندن تورنيبدیر!
آلما
اورگينين قانين اوزونه جالايیبدیر...
گوجكلنسين.
دامار-دامار قات-قات اتیني سويسالاردا
آغ ايچي باشين اوجالدار.
سکینه پورحسن
د لی
آياقلاريم سوكاكلاري يئیير
اوزومو لاتليغا وورورام ميزیلدایيرام دليسن دلي
سوكاكلار بويو خیاليمدا بوغولورام باغيريرام
كيمسه سسيمي دويمایير
يئنده ميزيلدایيرام دليسن دلي
آديني ايچيرم قانيما قاتيشمادان كئفلنيرم
بوم –بوش گولوب دئيرم دليسن دلي
اوزومدن اوتانيب باشيمي يئره تيكيرم
گوزلرييم بير آياق جيزيغيندا آغارير
آياقلاريم كونلومدن اوشاليق ديلنير
اما كونلوم بو اويوندا اوتوزماقدان بتر قورخور
آياقلاريم سووشور
خيياواندا دوغولور
گوزوم هر كيمسنين اوزونه قاچير گورورم...
اونلاردا ميزیلدايیر
دليسن دلي....
سکینه پورحسن
ویترین
گوز یاشلاریمی
ویترینده
ساتیشا قویموشلار...
سن سه بوش وریب ساورولان گوز یاشلارینا
ساختا بیر رسیمده
گوز یاشلاری آراییرسان.
ابوالفضل عطالو
بیلیت
آیریلیغین سون دوراغیندا
یانلیز ...
بیر یولجو دورموش
الینده ...
ایکی باشسیز
بیر بیلیت.
ابوالفضل عطالو
درباره وبلاگ
آرشيو مطالب
آخرين مطالب
موضوعات
پيوند ها
پيوندهاي روزانه
